As Pontes, 9 de xaneiro de 2023. O programa de apoio socieducativo “Espazo en Familia”, posto en marcha polo Concello das Pontes no ano 2021 para ofrecer ás familias pontesas un lugar para compartir as súas inquedanzas sobre a crianza e educación dos seus fillos e fillas e poder abordalas con éxito, chega aos centros educativos da vila coa finalidade de establecer vínculos de cooperación entre as familias e os centros educativos para desenvolver accións de crianza positiva.
Tania Pardo, concelleira de Educación apunta que “o programa Espazo en Familia parte da idea da necesaria colaboración entre as familias e os centros educativos na tarefa educativa e pedagóxica. Por este motivo, dentro da programación de actividades deste proxecto, propuxémonos achegar aos centros escolares diferentes propostas formativas, dirixidas a rapaces e rapazas, de 1 a 17 anos, que nos permitan traballar a igualdade, a alimentación saudable, as emocións, a convivencia ou o uso seguro das tecnoloxías, entre outras cuestións, para promover o seu óptimo desenvolvemento persoal.”
Estas actividades, que se puxeron en marcha no mes de novembro de 2022, desenvólvense a través de diferentes sesións, que dan continuidade ao traballo desenvolvido, desde o mes de abril, coas nais e pais a través de sesións grupais e individuais e accións de formación para “a partir dunha metodoloxía lúdica, impulsar entre as fillas e fillos, unha aprendizaxe sobre as diferentes temáticas, dunha maneira dinámica e motivadora, co obxectivo de que o alumnado cree o seu propio proceso de aprendizaxe, traballe de forma grupal e autónoma, promovendo entre eles e elas valores esenciais para a vida cotiá e a interacción social” subliña Tania Pardo
Estas sesións se desenvolverá ata o mes de marzo e nelas participarán máis de 1100 nenos e nenas da vila.
