As Pontes, 10 de xullo| A fachada da biblioteca municipal vai cambiar de imaxe logo de estrear un novo mural. A empresa coruñesa Lanaval deseñou un novo mural para ocupar a parede superior da praza de Ámerica que rodea o edificio da biblioteca municipal.
A figura de Enrique Rivera Rouco, cronista oficial da vila e que dá nome a este edificio cultural, ocupará un dos espazos do deseño que está vencellado á literatura local e que se extenderá ao longo dos 60 metros de fachada.
Incluiranse textos de poetas locais, recuperando os que estiveran xa no mural que tiñámos ata agora, pero incorporando novos versos de outros poetas, neste caso poetisas da localidade.
Os debuxos, nos que salienta a cor e o uso do graffiti, farán alusión ao reflectido nos poemas que figurarán nas paredes. Nestes días intensifícanse os traballos para poder cumprir a data de estrea desta nova cara co remozado coroamento da praza coñecida popularmente como Roxa e que, se o tempo acompaña, estarán rematados para o inicio oficial dos festexos locais, este mesmo venres.
