As Pontes, 3 de outubro| O programa Xoves na Biblio vai retomar, esta semana, a súa actividade.
Tralo merecido descanso dos meses de verán, a iniciativa impulsada dende a biblioteca municipal Enrique Rivera Rouco retoma o seu programa de actividades para que, os máis pequenos da casa, se interesen por desfrutar destas instalacións e todo o que teñen que ofrecer.
O programa deste mes de outubro arrincará da man dun interesante taller para crear un blog e tamén contidos audiovisuais. Baixo o título Facemos un blog? Facemos tv?, monitores de Fabaloba encargaranse de desenvolver un taller en dúas sesións para que os máis novos aprendan a utilizar este tipo de ferramentas e que poidan idear os seus propios contidos audiovisuais ou escritos.
A actividade está dirixida a pequenos e pequenas maiores de 9 anos e desenvolverase tanto este xoves, dende as 18.00h, na biblioteca municipal coma o día 19, no mesmo horario e nas mesmas dependencias.
Xa para o día 26 deste mes, e tamén dende as 18.00h, impartirase un taller adicado á figura do pintor catalán Joan Miró. Neste caso será a artista local Carmen Bellas a que dirixa esta actividade e que, xa o pasado inverno, foi do máis atractiva para pequenos e pequenas, mediante fotografías, vídeos e debuxos
Todos estes talleres serán de participación gratuíta, iso sí é preciso realizar reserva de praza ao seren limitadas. Para cumprir con este trámite tan só é necesario achegarse ata a propia biblioteca municipal e alí cumprimentar a pertinente inscrición.
