As Pontes, 26 de maio| Este martes 24 de maio as instalacións da coñecida marca Queserías del Eume, situadas na parroquia da Faeria en pleno corazón das Fragas do Eume, recibían o primeiro grupo de persoas dende a súa incorporación ao proxecto neste 2016.
Preto de 30 persoas desfrutaron dunha interesante visita acompañados por Ana Isabel Prieto, encargada de continuar cunha tradición familiar de máis de 50 anos na elaboración de queixos. Despois de ver o proceso produtivo, os asistentes gozaron dunha cata de queixos e requeixo; dende o produto máis vendido como o queixo envolto en papel, a outros con maior tempo de curación como o cremoso de 15 días ou o curado de 2 meses. Por suposto, o requeixo acompañado de mel de Goente.
Unha vez finalizada a visita e mercados os estupendos manxares do “Queixo da Faeira”, o grupo percorreu varios lugares emblemáticos das Fragas do Eume pontesas, como o embalse do Eume ou o curioso cementerio de San Pedro de Eume, coas sepulturas cubertas con conchas de vieira.
