O programa Compost da casa celebra unha nova xornada formativa

109

As Pontes, 18 xuño de 2018. Máis de 20 familias, que participan no programa Compost da Casa, posto en marcha polo Concello de As Pontes en colaboración con Sogama, asistiron o venres, 16 de xuño, a unha xornada formativa, impartida polos técnicos responsables do proxecto, para avaliar o seu grado de implantación, compartir experiencias, resolver dúbidas e coñecer ós primeiros resultados.

Durante esta xornada formativa os participantes contaron as súas propias experiencias e afondaron en cuestións relacionadas coa localización das composteiras, a frecuencia coa que aportan materia orgánica, a tipoloxía da mesma así como os problemas xurdidos durante o proceso de compostaxe.

Este é segundo encontro que as familia pontesas manteñen cos técnicos do programa tras as tres visitas que recibiron nos seus propios fogares e nas que obtiveron apio personalizado sobre as técnicas de compostaxe o que lles permitiu aprender todos os detalles sobre o proceso para lograr un abono de alta calidade.

Compost da casa é un programa pioneiro en Galicia, na actualidade en marcha en tres concellos galegos, no que participan medio centenar de fogares ponteses, localizados no centro urbano e nas parroquias de Ribadeume, Bermui, Goente, Espiñaredo, o Freixo e Aparral e no que tamén están implicadas a Escola Infantil A Barosa e o Centro de Educación Especial ASPANAES.

Trátase dun dobre programa de compostaxe, que puxo a disposición dos veciños un total de 53 composteiras; 27 caixóns de compostaxe doméstica tradicional e 27 composteiras de vermicompostaxe, que permiten a descomposición de residuos orgánicos mediante o uso de miñocas para obter un fertilizante de maior rendemento e gran calidade.

Monsterrat García, presente nesta reunión de traballo agradeceu a todas as familias participantes a súa implicación neste proxecto. “Por medio deste dobre programa de compostaxe, o Concello de As Pontes busca avanzar cara unha xestión máis sustentable dos residuos urbanos e promover un cambio de ámbitos entre os veciños nos que se dé prioridade ás tres erres; reducir, reutilizar e reciclar e, os primeiros resultados amosan que imos en boa dirección.

Compost da casa é unha experiencia piloto que aposta por minimizar a produción de refugallos, sacarlle o maior partido posible á materia orgánica a través de súa recuperación en orixe e impulsar a súa reutilización, transformando os residuos en recursos, dándolles novos usos que promoven o coidado do entorno natural e un crecemento sustentable.

Este programa súmase a outras campañas informativas, formativas e de concienciación postas en marcha polo Concello de As Pontes a través da Ecoescola de As Campeiras, un espazo no que o residuo se pon en valor, traballando no sistema de recollida selectiva, para promover o coidado e o respecto polo medio ambiente entre todos os veciños.