RTVEume | A concelleira de Emprego, Ana Pena, presidiu este luns, 20 de abril, a entrega de diplomas dos dous cursos de manipulador de alimentos que, o pasado mes de marzo, se desenvolveron dende o departamento que dirixe.
No acto, que tivo como escenario o salón de plenos do Concello, procedíase á entrega dos diplomas ás case medio cento de persoas que tomaron parte nos dous obradoiros de manipulador de alimentos de catro horas de duración, e que se desenvolveron nas dependencias do centro de dinamización empresarial de penapurreira.
A iniciativa, dirixida a desempregados, serviu para que os participantes puidesen aprender dende os coñecementos básicos en materia de hixiene alimentaria ata coñecer as prácticas correctas e os seus fundamentos á hora de traballar cos alimentos e, incluso, identificar aquelas prácticas incorrectas e as súas consecuencias á hora de traballar cos alimentos.
Pero esta non foi a única actividade formativa pola que apostaron, nestas semanas, nestes días aínda continúa a desenvolverse un segundo curso para desempregados que ten como obxectivo a busca de emprego e a potenciación dos puntos fortes do individuo á hora de lograr un posto de traballo.
Medio cento de veciños e veciñas están a participar nesta segunda actividade que se desenvolverá ata principios do vindeiro mes de maio.
