- A obra, cun orzamento de 649.000 euros, foi financiada pola Deputación da Coruña
- O goberno local renderalle homenaxe a Evaristo Puentes Durán
As Pontes, 12 de febreiro de 2019. O Concello de As Pontes inaugurará o vindeiro domingo, 17 de febreiro, ás 12:00 horas, o campo de céspede artificial do Poboado coa disputa dun encontro de veteranos do Club Deportivo de La Coruña e o Real Celta de Vigo.
Trátase dun campo polivalente, realizado con cargo ó POS+ da Deputación da Coruña e cun orzamento que superou os 649.000 euros, a través do que o goberno local referenda o seu compromiso co deporte local e de base.
A nova infraestrutura deportiva está deseñada para ser utilizada tanto polos 200 nenos e nenas que integran o Club Deportivo As Pontes como para a práctica doutros deportes tales como o rugby, o tiro con arco ou o fútbol gaélico.
As dimensións exteriores do céspede son de 111 por 71 metros, cunha superficie total de 7.881 metros cadrados, que permiten obter un campo de fútbol 11 (100×65 metros), un de rugby (95×65) e dous de fútbol 7 (65×44).
Conta, asemade, cunha beirarrúa perimetral de formigón de 2 metros de ancho en tres dos lados, e de 3,5 metros no outro para permitir o paso da maquinaria necesaria para os labores de mantemento e coidado do campo, e dispón dos sistemas de saneamento, rego, alumeado e o equipamento preciso para a práctica deportiva que inclúe porterías, banderines, redes de protección e bancos.
Esta actuación, que foi posible grazas a sinatura do convenio entre Endesa e o Concello de As Pontes, polo que as instalacións deportivas do Poboado das Veigas pasaban a ser propiedade municipal, enmárcase dentro do proxecto do goberno municipal para a posta en valor das instalacións deportivas da vila e favorecer a práctica deportiva, tendo como obxectivo prioritario albergar a maior cantidade de deportes posibles, permitindo practicalos en mellores condicións, reducindo os envites das condicións climatolóxicas sobre o terreo de xogo.
Homenaxe a Evaristo Puentes Durán
Neste mesmo acto, o goberno local renderalle homenaxe a Evaristo Puentes Durán, falecido fai cinco anos e que fora, durante máis de tres décadas, coidador das instalacións deportivas do Poboado, encargado do material do club de fútbol de As Pontes e masaxista.
Jesús Tembrás, concelleiro de Deporte e Xuventude, apunta que “a través desta homenaxe queremos recordar o compromiso, o traballo e a dedicación dunha persoa moi vencellada ó deporte local, en especial ó fútbol, e que tanto fixo polo mantemento dunhas instalacións das que, a partir do domingo, poderemos gozar todos os ponteses e pontesas, completamente renovadas”.
