As Pontes contrata as obras de mellora da Escola Infantil Municipal A Barosa

158

As Pontes, 10 de agosto de 2018. O Concello de As Pontes asinou, esta mañá, o contrato de renovación e mellora do edificio da Escola Municipal Infantil A Barosa co obxectivo de manter, conservar, mellorar e potenciar o uso dunha instalación cun importante volume de usuarios e unha  gran aceptación entre os ponteses.

Este proxecto, adxudicado á empresa Groma Obras S.L, por 59.219 euros, con cargo POS+2018, permitirá mellorar o acceso principal á escola infantil e ampliar a carpintería na rampla de entrada para crear unha protección contra o vento e a choiva.

As obras de acondicionamento inclúen a substitución dos pavimentos da rampla de acceso, do corredor interior e da súa zona anexa así como o acondicionamento do patio exterior co obxectivo de potenciar o seu uso, instalando céspede artificial e pavimento continuo de caucho. Todas estas actuacións levaranse a cabo sen afectar á accesibilidade do centro, executándose todos os accesos, percorridos e patios a nivel.

Por outra banda, tamén se mellorará a estética da fachada mediante a instalación de paneis decorativos e procederase a substitución de fiestras e portas para garantir unha maior eficiencia enerxética.

Os traballos de renovación e mellora do edifico da Escola Infantil Municipal A Barosa comezarán o luns, 13 de agosto, e estarán rematados antes do inicio do curso escolar.