Arrancan as obras na rúa Antonio Machado

112

As Pontes, 27 setembro de 2018.  Esta semana arrancaron as obras de mellora da rede de saneamento da Rúa Antonio Machado que permitirán a reposición da rede de augas residuais.

O proxecto contempla a instalación dunha canalización de pvc, que substituirá a actual canle de formigón, a súa conexión coas acometidas e sumidoiros existentes así como coas baixantes dos edificios. Tamén está prevista a execución de pozos de rexistro destinados a mellorar o mantemento da rede.

As actuacións, ademais, permitirán conectar esta nova rede co ramal que circula pola beirarrúa de enfronte, á altura da intersección coa a Rúa Rego do Campo e Antonio Machado, a renovación das arquetas e a instalación de reixas para evitar a entrada de sólidos na rede de saneamento. As obras inclúen a reposición dos pavimentos na beirarrúa e do aglomerado do viario.

Estes traballos, englobados dentro da proposta do Concello para renovar e modernizar as redes de abastecemento e saneamento municipais e abranguen tamén ás rúas Méndez Núñez e a Rúa Monte Caxado, permiten cumprir, ó grupo de goberno, co seu compromiso de optimizar o tratamento das augas en todo o termo municipal.

As tres actuacións teñen un orzamento conxunto de 105.297 euros con cargo ó Fondo de Compensación Ambiental.